Жаңалықтар
Триатлоннан ҚР қысқы чемпионаты өтеді
Наурыздың 1-2 күні «Сарыарқа» велотрегінде Жабық ғимараттағы триатлоннан Қазақстан Республикасының қысқы чемпионаты өтеді.
Бұл Қазақстандық Триатлон Федерациясының бастамасымен кәсіби спортшылар арасында өткізілетін ұлттық біріншілік. Аталмыш жарыстың мақсаты - мықты спортшыларды анықтау, отандық спортшылардың шеберлігін арттыру, елімізде триатлонды дамыту және салауатты өмір салтын насихаттау.
Оған Астана мен Шымкент қаласы, сонымен қатар Ақмола, Қарағанды, Қостанай, Түркістан және Шығыс-Қазақстан облыстарынан келген 15 жастан асқан 70-тен астам кәсіби спортшы додаға түспек. Бірінші күні спортшылар 200-400 м қашықтыққа жүзу және 1000-2000 м қашықтыққа жүгіруден жарысатын болса, екінші күні 2000-4000 м қашықтықтағы веложарыста бақ сынайды.
Бағдарламаға сәйкес:
1 наурыз:
08.45 сағ. Сайыстың ресми ашылу салтанаты.
09.00 сағ. Жүзу жарысының басталуы.
15.00 сағ. Жүгіру жарысының басталуы.
2 наурыз:
09.00 сағ. Веложарыстың басталуы.
12.30 сағ. Марапаттау салтанаты.
Жарыстың ұйымдастырушылары ҚР Мәдениет және спорт министрлігі, ҚР Ұлттық олимпиадалық комитеті, «Самрұқ-Қазына» ұлттық әл-ауқат қоры» Акционерлік Қоғамы, Астана қаласының әкімдігі, Қазақстандық Триатлон Федерациясы, Астана қалалық триатлон федерациясы.
Велосипед спортынан ОДО баспасөз қызметі